चाले आषाढीची वारी

चाले आषाढीची वारी 
वर आषाढाच्या सरी 
सारी गरजे पंढरी 
विठू नाम ll

संथ लय एक ताल 
चाले थोर वृद्ध बाल 
चिपळीच्या सवे टाळ 
वाजविती ll

डोईवर ती तुळस 
दिसे विठूचा कळस 
नाही पायाला आळस 
वेग वाढे ll

बळ देतो माझ्या पाया 
माझा पंढरीचा राया 
वारी पूर्ण ही कराया 
कृपा तुझी ll

विठू नाम सदा मुखे 
कळसासी डोळा देखे 
तिन्ही लोकीची हो सुखे 
त्याचे ठायी ll

माझ्या शहरी भावंडा 
वेळ काढुनिया थोडा 
मुखी विठ्ठल तेवढा 
आळवावा ll

- अनुराधा म्हापणकर http://webcache.googleusercontent.com/search?q=cache:ywMudXL7cowJ:maharashtratimes.indiatimes.com/rssarticleshow/21152996.cms+&cd=5&hl=en&ct=clnk&gl=in