Wednesday, April 9, 2008

नवरी..

भरला चुडा.. हातात
हिरवा कंच काचेचा
रंगलेला नक्षीदार
हात माझा मेंदीचा

पिवळे रेशमी वधुवस्त्र
पिवळे तेज हळदीचे
पैजण छुनछुन पायी
जोडवे नाजुक चांदीचे

मुंडावळ्या मोगरीच्या
गजरा कुंद सायलीचा
हाती अधीर पुष्पहार
गुलाबी टपोर्‍या कळीचा

आंतरपाटाचे वस्त्र मधे
पलिकडे विश्व खुणावणारे
नजरेत ओसंडतो विश्वास
दोन डोळे ते बोलावणारे

पडे अक्षतांचा पाऊस
"शुभ मंगल सावधान"..
भरली लग्न घटिका
विसरले देह भान

आंतरपाट दूर होतो
वरमाला मी घालते
हाती हात देऊनी
नव-वधु मी लाजते

हाती हळकुंड, ती सप्तपदी
मंगळसुत्राचा पहिला स्पर्श
झेलते मी नजरेनीच ते
अवखळ तुझे नेत्र-कटाक्ष

नव्या कोर्‍या शालूचा
कसा नवा कोरा वास
पेटवलेल्या होमाचा
आगळा वेगळा सुवास

आज एक नवा जन्म..
नवा अध्याय.. नवे जीवन..
सौभाग्याचे दान लाभले
सुखाने उमलूदे सहजीवन
.
.
सौ. अनुराधा म्हापणकर

3 comments:

  1. Aapan aaj achanak kiti varsh maag gelat ??? aani aajach ka?
    .
    matr Eka goshtich ullekh rahila asa mala watat.....
    Nava Adhyay .. Nave Jeevan .. suru kelelya aani Soubhagyache daan labhalelya anek janninna Aantarpata palikadach Te vishw " dole zalun " swikarava lagat.
    .
    Ek Blind Juggar ..... pan Vishwasacha!
    Tyacha ullekh kuthetari yayala hava hota.

    ReplyDelete
  2. khupach avadaliiii

    ReplyDelete
  3. mala khupach avadaliiii

    ReplyDelete